Weriye Raage Oomaar Oo Kullan Caalami ah La Qaatay Suxufiyiinta Soomaalida Ee K/Africa + Sawiro

Raage Oomaar, oo hawlo shaqo u yimid dalka Koonfur Africa, ayaa waraysiyo uu ku eegayo afkaaraha kala duwan ee ay Soomaalida ka qabaan nolosha dalkan South Africa la qaatay qaar ka mid ah ganacsatada iyo aqoonyahanada Soomaalida, isagoo muujiyey hawlkarnimo uu caalamka ku tusayo tacadiyada ba’an ee dalkan loogu gaysto qaxootiga Soomaaliyeed.

Hadaba Ururka Saxafiyiinta Soomaalida South Africa ee marka magaciisa lasoo gaabiyo loo yaqaano *SOJASA*, ayaa kullan ahmiyad leh kula qaatay Weriye Raage Oomaar Hotel ku yaala Magaalo-xeebeedka Cape Town, kaasi oo si weyn la iskula falanqeeyey dardar gelinta hawlaha Saxaafadda ee ay dalkan ka hayaan saxafiyiinta Soomaaliyeed.

Oomaar, ayaa ugu horeyn sharaxaad kooban ka bixiyey taariikhdiisa saxaafadeed iyo sida dhabar adeyga leh ee uu kusoo gaaray heerka uu haatan ka taagan yahay Saxaafadda Caalamka, isagoo sidaasi si la mid ahna kula dardaarmay Saxafiyiinta Soomaalida ee ka hawlgala K/Africa in ay si hufan u gutaan waajibaadkooda saxaafadeed islamarkaana ay si siman u tebiyaan dhacdooyinka Soomaalida.

Gudoomiyaha Saxafiyiinta South Africa Maxamed Muuse Nuur {Deeq-Darajo} ayaa si weyn u amaanay dhiirigelinta saxaafadeed ee uu siiyey Weriye Raage Oomaar oo uu ku tilmaamay Saxafi karti badan u leh hawlaha saxaafadda,islamarkaana kudayasho mudan isagoo sidoo kalena u mahad celiyey Gudoomiyaha Jaaliyadda Soomaalida ee SASA Inj. Xuseen Cali Cumar oo goob joog ka ahaa kullankaasi.

Weriye Raage Oomaar, oo ka tirsan Saxafiyiinta ugu hawlkarsan Weriyaasha Warbaahinta Caalamiga ah ee Aljazeera, islamarkaana daadihiye ka ah Barjaamijka Goobjoog *Witness* ayaa shaashadaha dunida kasoo muuqday ka dib warbixino uu si is daba joog ah uga soo tebinayey dalka Ciraaq xilligii duullaanka ba’an ay xukumaddii Sadam Hussein ku afgembiyeen huwanta uu hogaaminayo Maraykanka sanadkii 2003.

C/risaaq C/laahi Maxamed

Indhojaceel2003@hotmail.com

www.wariyaha.com

Maamulka Wariyaha.com Kala xiriir Email:suxufi@yahoo.com